១. ធុរកិច្ចដែលមានលក្ខណៈអនុវត្តជាក់ស្ដែងដ៏ធំបំផុតក្នុងពិភពលោក (អានលម្អិត)
យុទ្ធនាការរៀនធ្វើជំនួញ ឬ #GoBusiness17 ជាកម្មវិធីបង្ហាត់យុវជនកម្ពុជាដើម្បីត្រៀមខ្លួនរួចជាស្រេចសម្រាប់ទីផ្សារការងារ ដែលបានចូលរួមដោយយុវជនកម្ពុជាចំនួន ២៣០៤នាក់ ជាចំនួនដ៏ច្រើនបំផុតមិនធ្លាប់មានពីមុននៅលើពិភពលោក។ ចំណែកអ្នកចូលរួមមានអាយុចាប់ពី១៥ឆ្នាំ ដល់២៩ឆ្នាំ ហើយសិក្ខាសាលាខ្នាតយក្សនេះ ប្រព្រឹត្តឡើងតាំងពីថ្ងៃទី២៤ ខែសីហា ឆ្នាំ២០១៧ នៅមជ្ឈមណ្ឌលសន្និបាត និងពិព័រណ៍កោះពេជ្រ។ ឥឡូវនេះ ព្រឹត្តិការណ៍ខាងលើបានបំបែកកំណត់ត្រាពិភពលោក Guinnessស្ដីពីសិក្ខាសាលាធុរកិច្ចអនុវត្តន៍ជាក់ស្ដែងដ៏ធំបំផុតនៅលើពិភពលោក។
២. រាំចង្វាក់ម៉ាឌីហ្សុន ដែលមានអ្នកចូលរួមច្រើនបំផុត (
អានលម្អិត)
កាលពីថ្ងៃទី១៥ ខែមេសា ឆ្នាំ២០១៥ កន្លងទៅថ្មីៗនេះ មនុស្សចំនួន ២០១៥នាក់ បានចូលរួមរាំចង្វាក់ម៉ាឌីហ្សុនក្នុងព្រឹត្តិការណ៍អង្គរសង្ក្រាន្តខេត្តសៀមរាប បំបែកកំណត់ត្រាពិភពលោកចាស់ដែលកាន់កាប់ដោយប្រទេសអូស្ត្រាលីកាលពីឆ្នាំមុនក្នុងចំនួនអ្នកចូលរួម ១១៥០នាក់។
៣. នំអន្សមយក្សខ្មែរត្រូវបានបញ្ចូលក្នុងកំណត់ត្រាពិភពលោក Guinness
World Records
នំអន្សមយក្ស ដែលធ្វើឡើងដើម្បីអបអរព្រឹត្តិការណ៍អង្គរសង្រ្កាន្តឆ្នាំ ២០១៥ ត្រូវបានចៅក្រមអន្តរជាតិសម្រេចដាក់ចូលទៅក្នុងកំណត់ត្រាពិភពលោក Guinness World Records ដោយជោគជ័យហើយ នារសៀលថ្ងៃទី ១៣ ខែ មេសា ឆ្នាំ២០១៥។ នេះបើតាមសេចក្តីប្រកាសព័ត៌មានរបស់សហភាពសហព័ន្ធយុវជនកម្ពុជា។
នំអន្សមយក្សមានទម្ងន់ដល់ទៅប្រមាណជាង ៤ តោន ក្រោយពីបានចម្អិនអស់រយៈពេល ៤៥ ម៉ោង ដែលទម្ងន់នេះ ជាទម្ងន់ដែលមិនធ្លាប់មានពីមុនមកនំអន្សមនេះ ត្រូវបានវេចខ្ចប់ដោយស្លឹកចេកទម្ងន់ ៣៣៣ គីឡូក្រាម និង ខ្សែចេកចំនួន ៣៧៥ គីឡូក្រាម ដោយមានគ្រឿងផ្សំ អង្ករដំណើប១,០០០ គីឡូក្រាម ខ្ទិះដូង ៤៩៩ គីឡូក្រាម អំបិល ១៥ គីឡូក្រាម សណ្ដែកបាយ ៤៩៩ គីឡូក្រាម សាច់ជ្រូកបីជាន់ ៥០៧ គីឡូក្រាម ស្ករ៤គីឡូក្រាម ម្រេចកំពត ៣ គីឡូក្រាម ខ្ទឹមចិញ្ច្រាំ ១០ គីឡូក្រាម និង ស្លឹកខ្ទឹមចិញ្រ្ចាំ ១៦ គីឡូក្រាម។ នំអន្សមនេះ ត្រូវបានចម្អិនតាមលក្ខណៈបច្ចេកទេសត្រឹមត្រូវ និង មានរសជាតិទាក់ទាញ ជាពិសេសនំអន្សមនេះ ត្រូវបានចម្អិនឡើងដោយក្រុមមេចុងភៅខ្មែរ និង កូនកំាំបិតចំនួន ១០០នាក់។
លោក ចាន់ សុភា តំណាងសមាគមចុងភៅកម្ពុជាបាននិយាយក្នុងទឹកមុខរីករាយថា ក្នុងនាមជាតំណាងសមាគមចុងភៅ ក៏ដូចជា ប្រជាជនកម្ពុជានៅទូទាំងប្រទេស លោកពិតជាមានមោទនភាព ដែលក្រុមការងារទាំងអស់បានរួមគ្នាធ្វើឲ្យកម្ពុជាបានលេចធ្លោនៅក្នុងពិភពលោក។
នំអន្សម ជាទូទៅត្រូវបានប្រជាជនខ្មែរធ្វើឡើងដើម្បីយកទៅប្រគេនព្រះសង្ឃ និង សែនព្រេនដល់បុព្វបុរសរបស់ខ្លួន ហើយពេលខ្លះអាចធ្វើជាអំណោយសម្រាប់សាច់ញាតិ បងប្អូន និងមិត្តភ័ក្ដិនៅក្នុងពិធីបុណ្យផ្សេងៗដូចជា ពិធីបុណ្យចូលឆ្នាំ និងភ្ជុំបិណ្ឌជាដើម ហើយសូម្បីតែពិធីមង្គលការក៏មាននំអន្សមដែរ។
គួរបញ្ជាក់ថា នំអន្សមនេះត្រូវបានធ្វើឡើងដោយសមាគមចុងភៅកម្ពុជា សហការជាមួយនឹងសមាគមស្រូវអង្ករកម្ពុជា ក្រសួងពាណិជ្ជកម្ម ក្រោមកិច្ចសម្របសម្រួលពីសហភាពសហព័ន្ធយុវជនកម្ពុជា ដើម្បីចូលរួមអបអរពិធីបុណ្យចូលឆ្នាំថ្មីប្រពៃណីជាតិខ្មែរ ។
៤. មានតួអក្សរច្រើនបំផុត
តួអក្សរខ្មែរដែលស្ថាប័ន Guinness ទទួលស្គាល់មានទាំងអស់ ៧៤តួ (បច្ចុប្បន្នមិនប្រើទាំងអស់ទេ) ច្រើនលើសអក្ខរក្រមប្រទេសដទៃទៀតក្នុងលោក។
៥. ព្រះមហាក្សត្រ ដែលធ្លាប់កាន់តំណែងច្រើនបំផុត
ព្រះមហាវីរក្សត្រ ព្រះបាទនរោត្តម សីហនុ ព្រះបរមរតនកោដ្ឋ ធ្លាប់កាន់មុខតំណែងជាច្រើនដូចជា៖
ឆ្នាំ១៩៤១ ដល់១៩៥៥ ជាព្រះមហាក្សត្រ
ឆ្នាំ១៩៥៥ ដល់១៩៦៦ ជានាយករដ្ឋមន្ត្រី
ឆ្នាំ១៩៦០ ដល់១៩៧០ ជាព្រះប្រមុខរដ្ឋ
ឆ្នាំ១៩៧០ ជាប្រមុខរដ្ឋាភិបាលនិរទេស
ឆ្នាំ១៩៧៦ ជាប្រធានាធិបតី
ឆ្នាំ១៩៨២ ដល់១៩៨៨ ជាប្រធានាធិបតីនិរទេស
ឆ្នាំ១៩៨៩ ដល់១៩៩១ ជាប្រមុខរដ្ឋាភិបាលនិរទេស
ឆ្នាំ១៩៩១ ជាប្រធានក្រុមប្រឹក្សាជាតិជាន់ខ្ពស់
ឆ្នាំ១៩៩១ ដល់១៩៩៣ ជាព្រះប្រមុខរដ្ឋ
ឆ្នាំ១៩៩៣ ព្រះអង្គទ្រង់ឡើងគ្រងសម្បត្តិជាលើកទី២ រហូតដល់ដាក់រាជ្យសម្បត្តិក្នុងឆ្នាំ២០០៤
៦. ទឹកច្រាលឡើងលឿនបំផុត
អំឡុងពេលរដូវវស្សា ទឹកទន្លេមេគង្គនៃប្រទេសកម្ពុជាជាប់ព្រំដែនឡាវ បានច្រាលឡើង ២០ដង ដែលចាល់ទឹកលាតសន្ធឹងដូចជាកូនសមុទ្រតូចមួយក្នុងទំហំ ពី១០ ទៅ ១៤គីឡូម៉ែត្រ។ អត្រាលំហូរទឹកនៅតំបន់នេះ ស្មើនឹង ២ដងនៃទឹកធ្លាក់ Niagara នៅចន្លោះប្រទេសកាណាដា និងសហរដ្ឋអាមេរិក។ ក្នុងមួយនាទី ទឹកប្រមាណ ១០លានម៉ែត្រគីប ហូរខ្លាំងដូចរន្ទះចាក់ខ្វាត់ខ្វែងតាមចន្លោះកោះនានា។
៧. អណ្ដើកទឹកសាបដែលខ្ជិលជាងគេលើលោក
អណ្ដើកទឹកសាប ដែលមានកំណើតនៅក្នុងទន្លេមេគង្គនៃប្រទេសកម្ពុជា (Pelochelys cantorii) បានចំណាយពេល ៩៥ភាគរយនៃជីវិតរស់នៅក្រោមខ្សាច់បាតទន្លេ រង់ចាំចំណីអាហារទៅជិតមាត់។ អណ្ដើកកម្ជិលនេះឡើងលើផ្ទៃទឹកត្រឹមតែ ២ដងប៉ុណ្ណោះក្នុងមួយថ្ងៃ ដើម្បីដកដង្ហើម។
៨. សំណង់ឧទ្ទិសសាសនាធំបំផុត
សំណង់ទាំងអស់នៃប្រជុំប្រាសាទអង្គរវត្ត ត្រូវបានសាងសង់ឡើងលើផ្ទៃដី ១៦២,៦ហិចតា ដែលជាសំណង់ឧទ្ទិសសាសនាធំជាងគេបំផុតក្នុងលោក។ ព្រះបាទសូរ្យវរ្ម័នទី២ ជាអ្នកសាងសង់ប្រាសាទដ៏អស្ចារ្យនេះឡើង ក្នុងឆ្នាំ១១១៣ ដល់១១៥០ ដើម្បីឧទ្ទិសដល់អាទិទេពសាសនាហិណ្ឌូ ព្រះវិស្ណុ។
