សហជីពចំនួន៥ អំពាវនាវទៅសហគមន៍អឺរ៉ុប និងសហរដ្ឋអាមេរិក កុំដាក់ទណ្ឌកម្មសេដ្ឋកិច្ចលើប្រទេសកម្ពុជា និងថា មិនចង់ឲ្យអ្នកដឹកនាំខ្មែរ យកពលរដ្ឋ ធ្វើជាចំណាប់ខ្មាំងក្នុងរឿងនយោបាយឡើយ។
ក្នុងលិខិតមួយ ដែលផ្ញើជូនទៅឯកអគ្គរដ្ឋទូតអាមេរិកប្រចាំនៅកម្ពុជា លោក វីល្លៀម ហៃដ្ត នាព្រឹកថ្ងៃពុធនេះ សហជីពចំនួន៥ លើកឡើងថា ពួកគេមានក្ដីបារម្ភយ៉ាងខ្លាំង បន្ទាប់ពីរដ្ឋាភិបាលសហរដ្ឋអាមេរិក បានព្រមានបញ្ឈប់ផ្ដល់ការអនុគ្រោះពន្ធ និងការលើកលែងពន្ធផ្សេងៗ ដល់កម្ពុជា ដោយថា ទណ្ឌកម្មនេះ នឹងធ្វើឲ្យបះពាល់ដល់សេដ្ឋកិច្ចជាតិ និងក្រុមកម្មកររោងចក្រប្រមាណ៨០ម៉ឺននាក់។
បើតាមលិខិតនេះ សហជីពទាំង៥ រួមមាន សហភាពចលនាកម្មករកម្ពុជា (CCW) សមាគមអភិវឌ្ឍន៍សេដ្ឋកិច្ចពលរដ្ឋកម្ពុជា (CDPLA) សម្ព័ន្ធសហជីពចលនាកម្មករ (CUMW) សមាគមអ្នកបម្រើការងារតាមផ្ទះ (ADW) និងសម្ព័ន្ធសហជីពការងារឯករាជ្យ (ILUC)។
ក្រុមសហជីព ស្នើឲ្យសហរដ្ឋអាមេរិក ពិចារណាចំពោះការដាក់ទណ្ឌកម្មឡើងវិញ និងថា មិនចង់ឃើញក្រុមកម្មករនិយោជិត ក្លាយជាជនរងគ្រោះ និងចំណាប់ខ្មាំង របស់អ្នកនយោបាយខ្មែរឡើយ។
ក្នុងលិខិតនោះ ក្រុមសហជីព លើកឡើងថា៖ «ក្នុងនាមយើងខ្ញុំ តំណាងឲ្យកម្មករនិយោជិតនៅកម្ពុជា ដែលបាននឹងកំពុងធ្វើសកម្មភាពការងារយ៉ាងសកម្ម ក្នុងការជំរុញឲ្យមានការលើកកម្ពស់លក្ខខណ្ឌការងារ និងជីវភាពជូនកម្មករនិយោជិត ពិតជាមិនចង់ឃើញកម្មករនិយោជិតក្លាយជាជនរងគ្រោះ និងជាចំណាប់ខ្មាំងរបស់ក្រុមអ្នកនយោបាយណាមួយឡើយ»។
ក្នុងលិខិតមួយទៀត ផ្ញើទៅឯកអគ្គរដ្ឋទូតសហភាពអឺរ៉ុបប្រចាំកម្ពុជា លោក Gorge Edgar នៅថ្ងៃពុធនេះ ក្រុមសហជីពដដែលនេះ ក៏ស្នើដល់សហគមន៍អឺរ៉ុប ដែលជាទីផ្សារនាំចេញដ៏ធំ ក្នុងវិស័យកាត់ដេរសំលៀកបំពាក់ និងស្បែកជើង អនុញ្ញាតឲ្យកម្ពុជា អាចបន្ដនាំចេញទំនិញនានាទៅកាន់ទីផ្សារអន្ដរជាតិ និងបន្ថែមការបញ្ជាទិញពីកម្ពុជា ឲ្យបានច្រើនជាងមុន។
ការអំពាវនាវរបស់ក្រុមសហជីព គឺបន្ទាប់ពីសហគមន៍អឺរ៉ុប សហរដ្ឋអាមេរិក និងប្រទេសលោកសេរីមួយចំនួន បានព្រមានដាក់ទណ្ឌកម្មលើកម្ពុជា ក្រោយមានការរំលាយគណបក្សប្រឆាំងដ៏ធំ កាលពីពេលថ្មីៗនេះ។ ប្រទេសលោកសេរីទាំងនេះ បានជំរុញជាច្រើនដង ឲ្យរដ្ឋាភិបាលកម្ពុជា ងាកមកដើរតាមគន្លងលទ្ធិប្រជាធិបតេយ្យ និងគោរពសិទ្ធិមនុស្ស។
ប្រធានសហភាពចលនាកម្មករកម្ពុជា លោក ប៉ាវ ស៊ីណា អះអាងថា ការដែលក្រុមសហជីព មិនដាក់លិខិតទៅរដ្ឋាភិបាលនោះ ព្រោះលោកថា មិនចង់ដាក់បន្ទុកឲ្យភាគីណាមួយ និងចង់ឲ្យអន្ដរជាតិ ដើរតួជាអ្នកសម្របសម្រួលដោះស្រាយបញ្ហានយោបាយ ដែលកំពុងតានតឹងនេះ។
លោកស្នើថា អ្នកនយោបាយ គួរពិភាក្សាគ្នារកដំណោះស្រាយ មុននឹងអន្ដរជាតិដាក់ទណ្ឌកម្ម ដែលធ្វើប្រជាពលរដ្ឋខ្មែរ ក្លាយជាជនរងគ្រោះទៅវិញ។
ក្នុងបទសម្ភាសន៍ផ្ដាច់មុខជាមួយវិទ្យុ VOA នៅព្រឹកនេះដែរ ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក លោក វីល្លៀម ហៃដ្ត មានប្រសាសន៍ថា សហរដ្ឋអាមេរិក កំពុងពិនិត្យមើលគោលនយោបាយការបរទេសជាមួយកម្ពុជាឡើងវិញ បន្ទាប់ពីគណបក្សសង្រ្គោះជាតិ ដែលគេរំពឹងថា អាចយកឈ្នះការបោះឆ្នោតនៅឆ្នាំក្រោយ បែរជាត្រូវគេរំលាយចោល។
លោក លោក វីល្លៀម ហៃដ្ត យល់ថា នៅកម្ពុជា ពិបាកស្វែងយល់ពីលទ្ធិប្រជាធិបតេយ្យ និងការបោះឆ្នោត ដែលមានភាពត្រឹមត្រូវ និងយុត្តិធម៌ បន្ទាប់ពីបាត់បង់គណបក្សប្រឆាំងដ៏ធំ ដែលធ្វើឲ្យពលរដ្ឋ មិនអាចជ្រើសរើសគណបក្ស ដែលពួកគេពេញចិត្ត។
ស្ថានការណ៍នយោបាយកម្ពុជាបច្ចុប្បន្ននេះ ត្រូវបានមជ្ឈដ្ឋានជាតិ និងអន្តរជាតិមើលឃើញថា កំពុងមានភាពតានតឹង បន្ទាប់ពីលោក កឹម សុខា ត្រូវបានចាប់ខ្លួនដាក់ពន្ធនាគារ ហើយគណបក្សប្រឆាំងដ៏ធំ ត្រូវបានរំលាយចោលកាលពីថ្ងៃទី១៦ខែវិច្ឆិកា៕
បើតាមរបាយការណ៍ ផលិតផលក្នុងវិស័យកាត់ដេរសំលៀកបំពាក់ ស្បែកជើង និងវិស័យផ្សេងទៀត ប្រមាណ៨០ភាគរយ ត្រូវបាននាំចេញទៅកាន់ទីផ្សារអឺរ៉ុប និងសហរដ្ឋអាមេរិក។ ហើយក្រុមសហជីពថា បើបិទច្រកទីផ្សារទាំង២នេះមែន នោះនឹងធ្វើប៉ះពាល់ជីវភាពកម្មករ ប្រមាណ៨០ម៉ឺននាក់៕
យោងតាមសេចក្តីប្រកាសព័ត៌មានរបស់ក្រុមហ៊ុនខនហ្វីរេល នៅព្រឹកថ្ងៃទី២១ ខែវិច្ឆិកា ឆ្នាំ២០១៧ ស្ករត្នោតសរីរាង្គកម្ពុជាទទួលបានពានរង្វាន់លេខ១ ជាផលិតផលល្អបំផុតប្រចាំអាស៊ានក្នុងឆ្នាំ ២០១៧ នៅក្នុងសន្និសីទម្ហូបអាហារអាស៊ានលើកទី១៥ ដែលប្រព្រិត្តទៅនៅប្រទេសវៀតណាម។
នេះគឺជាលើកដំបូងដែល ស្ករត្នោតកម្ពុជាបានទទួលរង្វាន់ជាមេដាយមាសនៅក្នុងតំបន់អាស៊ាន បន្ទាប់ពីរយៈពេល ១២ ឆ្នាំនៃការទទួលបានពានដូចគ្នានេះប្រចាំតំបន់អឺរ៉ុប។
មកដល់ពេលនេះ មានតែស្ករត្នោតកំពង់ស្ពឺរបស់កម្ពុជាប៉ុណ្ណោះ ដែលទទួលបានឋានៈជាផលិតផលសម្គាល់ ទីតាំងភូមិសាស្ត្រ ឬ (GI)។
ក្រៅពីផលិតផលស្ករត្នោត កម្ពុជាបានចុះបញ្ជីផលិតផល GI លើផលិតផលម្រេចកំពត និងផលិតផលមួយចំនួនទៀតដោយទទួលបានការការពារស្របច្បាប់ពីប្រទេសថៃ ជាពិសេសនៅសហភាពអឺរ៉ុបរួចមកហើយ។
(ភ្នំពេញ)៖ ច្បាប់ពាណិជ្ជកម្មថ្មីមួយត្រូវបានប្រកាសឲ្យប្រើប្រាស់ជាផ្លូវការ បន្ទាប់ពីឆ្លងកាត់ការអនុម័តដោយរដ្ឋសភា និងព្រឹទ្ធសភា ព្រមទាំងទទួលបានឡាយព្រះហស្តលេខាពីព្រះមហាក្សត្រ នាថ្ងៃទី១៧ ខែវិច្ឆិកា ឆ្នាំ២០១៧ កន្លងទៅនេះ។ ច្បាប់នេះត្រូវបានរៀបចំឡើងយ៉ាងផ្ចឹតផ្ចង់ ដោយមានកិច្ចខិតខំប្រឹងប្រែងពីសំណាក់ក្រសួងពាណិជ្ជកម្ម ក្រោយការដឹកនាំរបស់ឯកឧត្តមរដ្ឋមន្ត្រី ប៉ាន សូរស័ក្តិ ដែលជាផ្នែកមួយក្នុងការធ្វើកំណែទម្រង់ក្នុងស្រុក ដើម្បីឲ្យសមស្របទៅតាមវិធានពាណិជ្ជកម្មអន្តរជាតិ។
សេចក្តីលម្អិតនៃច្បាប់នេះមានបកស្រាយជូនដូចខាងក្រោម៖
(ក្រុងព្រះសីហនុ)៖ សិក្ខាសាលារយៈពេល ២ថ្ងៃ ស្តីពីការច្នៃប្រឌិតប្រព័ន្ធវៃឆ្លាតសម្រាប់លំហូរព័ត៌មានដំឡូងមីដោយរលូន ដែលរៀបចំដោយវិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវនៃក្រសួងពាណិជ្ជកម្ម សហការជាមួយកម្មវិធីអភិវឌ្ឍន៍សហប្រជាជាតិ (UNDP) ត្រូវបានប្រារព្ធពិធីបើកជាផ្លូវការ កាលពីព្រឹកថ្ងៃទី២០ ខែវិច្ឆិកា ឆ្នាំ២០១៧ ក្រោមអធិបតីភាព ឯកឧត្តម រាជ រ៉ា អនុរដ្ឋលេខាធិការ ក្រសួងពាណិជ្ជកម្ម។
សិក្ខាសាលានេះ ក៏មានការចូលរួមពីថ្នាក់ដឹកនាំ និងមន្រ្តីរាជការនៃក្រសួងពាណិជ្ជកម្ម មន្ទីរពាណិជ្ជកម្មខេត្ត ក្រសួងកសិកម្មរុក្ខាប្រមាញ់ និងនេសាទ មន្ទីរកសិកម្មខេត្ត សមាគមន៍ដំឡូងមី ក្រុមហ៊ុនកែច្នៃដំឡូងមី ក្រុមហ៊ុននាំចេញដំឡូងមី និងសាស្រ្តាចារ្យមកពីសកលវិទ្យាល័យចំនួន១០ សរុបជាង ១០០នាក់។ គោលបំណងសំខាន់នៃសិក្ខាសាលានេះ គឺដើម្បីចែករំលែកចំណេះដឹងជូនសិក្ខាកាម អំពីការប្រមូលព័ត៌មាន ការព្យាករណ៍ទិន្នន័យអនាគត ការបង្កើតបណ្តាញព័ត៌មានទីផ្សារដំឡូងមី និងការប្រើប្រាស់ឧបករណ៍វិភាគទីផ្សារអន្តរជាតិ ព្រមទាំងបញ្ហាអនាម័យ និងភូតគាមអនាម័យ (SPS) ក្នុងការផលិតដំឡូងមី ស្របតាមស្តង់ដារទីផ្សារអន្តរជាតិ។
នៅក្នុងសុន្ទករថាបើកកម្មវិធី ឯកឧត្តម រាជ រ៉ា បានលើកឡើងអំពីសមិទ្ធផលសំខាន់ៗរបស់ក្រសួងពាណិជ្ជកម្មដូចជា ការដាក់ឱ្យដំណើរការប្រព័ន្ធស្វ័យប្រវត្តិកម្មផ្សេងៗ និងការធ្វើប្រតិភូកម្មការស្នើសុំវិញ្ញាបនបត្របញ្ជាក់ប្រភពដើមទំនិញ (CO) ទម្រង់ D នៅក្នុងខេត្តប៉ៃលិន និងបាត់ដំបង ដើម្បីជំរុញកិច្ចសម្រួលពាណិជ្ជកម្ម និងលើកកម្ពស់បរិយាកាសធុរកិច្ចនៅកម្ពុជា។ ឯកឧត្តមបានបន្តទៀតថា បច្ចុប្បន្នក្រសួងពាណិជ្ជកម្ម កំពុងរៀបចំគោលនយោបាយដំឡូងមី ដើម្បីកៀងគរវិស័យឯកជន និងភាគីពាក់ព័ន្ធចូលរួមអភិវឌ្ឍន៍ចង្វាក់តម្លៃផលិតផលដំឡូងមី និងធ្វើពិពិធកម្មការនាំចេញផលិតផលដ៏មានសក្តានុពលនេះ ទៅកាន់ទីផ្សារអន្តរជាតិឲ្យបានអតិបរិមា នាពេលអនាគត។
លោក សួន វិជ្ជា ប្រធានវិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវ បានបង្ហាញជូនសិក្ខាកាមអំពីការប្រើប្រាស់ឧបករណ៍វិភាគទីផ្សារអន្តរជាតិ (ITC) សម្រាប់ផលិតផលដំឡូងមី ដូចជាការស្វែងរកទំហំពាណិជ្ជកម្ម អត្រាកើនឡើងនៃការនាំចូល សន្ទស្សន៍ថ្លៃនាំចូល និងអត្រាពន្ធគយ ដើម្បីទទួលបានភាពអនុគ្រោះពីតំបន់ពាណិជ្ជកម្មសេរី។ លើសពីនេះ លោកប្រធានក៏បានចែករំលែកពីឱកាស និងបញ្ហាប្រឈមមួយចំនួន សម្រាប់សហគ្រាសធុនតូច និងមធ្យម ក្នុងការកំណត់សក្តានុពលទីផ្សារ និងការអនុវត្តស្តង់ដារផលិតផល ស្របតាមទីផ្សារក្នុងតំបន់ និងពិភពលោក៕
នៅក្នុងប្រទេសកម្ពុជា កំណើនការដាំដុះដំឡូងមីនៅតែបន្តកើនឡើង ក្នុងចំណោមផលិតផលកសិកម្មសំខាន់ៗ ដោយសារតែប្រជាកសិករខ្មែរចូលចិត្តធ្វើកសិកម្មលក្ខណៈវិលជុំ។ យោងតាមរបាយការណ៍ក្រសួងកសិកម្ម ការដាំដុះដំឡូងមីចាប់ពីឆ្នាំ២០០០ បានកើនពី ១៦ពាន់ហិកតា ដល់ជាង ៦០០ពាន់ហិតា ហើយបានផ្តល់ទិន្នផលសរុប ១៣លានតោន កាលពីឆ្នាំ២០១៦ នៅក្នុងនោះខេត្តបាត់ដំបង មានដីដាំដុះធំជាងគេ គឺរហូតដល់ ១៥៥,៤២៤ហិកតា៕
ថ្មីៗនេះ អគ្គនាយកដ្ឋានពន្ធដារបានដាក់ឲ្យដំណើរការនូវការបង់ប្រាក់ពន្ធតាមរយៈធនាគារ និងតាមរយៈអនឡាញ។ សូមទស្សនាវីដេអូរខាងក្រោយដើម្បីស្វែងយល់លម្អិត។
តាមសំណើសុំវិនិយោគរបស់ក្រុមហ៊ុន គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញ “វិញ្ញាបនប័ត្រចុះបញ្ជីជាស្ថាពរ” ជូនដល់ក្រុមហ៊ុនដូចខាងក្រោម៖
១) “Pro-Water International (Cambodia) Co., Ltd.”: គម្រោងបង្កើតរោងចក្រផលិតសម្ភារៈបរិក្ខារ គ្រឿងបង្គុំអាងហែលទឹក និងអាងប្រព្រឹត្តិកម្មទឹកស្អាត, មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសព្រះសីហនុ ខេត្តព្រះសីហនុ, មានទុនវិនិយោគប្រមាណ ៥,២លានដុល្លារអាមេរិក និងអាចបង្កើតការងារបានចំនួន ៤២៥នាក់។
២) “Re Theng Tobacco Co., Ltd.”: គម្រោងបង្កើតរោងចក្រផលិតបារី, មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសដ្រេហ្គនឃីងបាវិត ខេត្តស្វាយរៀង, មានទុនវិនិយោគប្រមាណ ១,១៤លានដុល្លារអាមេរិក និងអាចបង្កើតការងារបានចំនួន ២១៥នាក់។
តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញ “វិញ្ញាបនប័ត្រចុះបញ្ជីជាស្ថាពរ” ជូនដល់ក្រុមហ៊ុនដូចខាងក្រោម៖
១) “TIMBERMET (CAMBODIA) CO., LTD.”: គម្រោងបង្កើតរោងចក្រកាត់ដេរសម្លៀកបំពាក់, មានទីតាំងវិនិយោគស្ថិតនៅផ្លូវ២២៤ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ, មានទុនវិនិយោគប្រមាណ ២,៣៤លានដុល្លារអាមេរិក និងអាចបង្កើតការងារបានចំនួន ៨៥៤នាក់។
២) “PANEFORT (CAMBODIA) GARMENT CO., LTD.”: គម្រោងបង្កើតរោងចក្រកាត់ដេរសម្លៀកបំពាក់, មានទីតាំងវិនិយោគស្ថិតនៅភូមិព្រែកត្រែង ឃុំសំរោងធំ ស្រុកកៀនស្វាយ ខេត្តកណ្តាល, មានទុនវិនិយោគប្រមាណ ៦,៤៦លានដុល្លារអាមេរិក និងអាចបង្កើតការងារបានចំនួន ២.០៥០នាក់។
តាមសំណើសុំវិនិយោគលើគម្រោងបង្កើតរោងចក្រកាត់ដេរសម្លៀកបំពាក់របស់ក្រុមហ៊ុន “FUSHUN CAMBO FASHION CO., LTD” គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញ “វិញ្ញាបនប័ត្រចុះបញ្ជីជាស្ថាពរ” ជូនដល់ក្រុមហ៊ុនខាងលើ ដែលមានទីតាំងវិនិយោគស្ថិតនៅភូមិកណ្តឹងតូច ឃុំកណ្តឹង ស្រុកបាទី ខេត្តតាកែវ មានទុនវិនិយោគប្រមាណ ២,៤៥លានដុល្លារអាមេរិក និងអាចបង្កើតការងារបានចំនួន ១.០៦៩នាក់។
នៅថ្ងៃទី២០ ខែសីហា ឆ្នាំ២០១៧នេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានផ្តល់ការដូរពិសេស គួរជាទីគាប់ចិត្ត សម្រាប់បងប្អូន កូនក្មួយ ដែលជាកម្មករ-កម្មការនី ដោយមានរយៈពេលពីរឆ្នាំ។ សម្តេចបានមានប្រសាសន៍ថា កម្មករ-កម្មការនី អាចជិះឡានក្រុងរបស់សាលារាជធានីភ្នំពេញ ដោយគ្រាន់តែបង្ហាញកាតបុគ្គលិកកម្មកររោងចក្ររបស់ខ្លួន នោះនឹងទទួលបានការជិះឡានក្រុងដោយឥតគិតថ្លៃ គ្រប់ទីកន្លែងនៅក្នុងរាជធានីភ្នំពេញ រហូតដល់ថ្ងៃទី២០ ខែសីហា ឆ្នាំ២០១៩។ សូមស្តាប់ប្រសាសន៍របស់សម្តេចតេជោ ទាំងស្រុងតាមរយៈវីដេអូរខាងក្រោម៖
១៤ ខែសីហា ឆ្នាំ២០១៧ ឯកឧត្តម សុខ ចិន្ដាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា ដោយមានការចូលរួមពីសំណាក់លោកប្រធានទីភ្នាក់ងារជំរុញការវិនិយោគ និងពាណិជ្ជកម្មកូរ៉េ (KOTRA) បានដឹកនាំក្រុមការងារបន្តទស្សនកិច្ចនៅក្រុមមហ៊ុនកូរ៉េពីរ នៅខេត្តកំពង់ស្ពឺ។
ក្រុមមហ៊ុនទីមួយគឺ MH Bio Farms បានវិនិយោគលើផ្ទៃដីសរុបទំហំប្រមាណ៨.០០០ហិកតា ដើម្បីដាំដំណាំមួយចំនួន ដូចជា ចេក អំពៅ ស្វាយ អាកាស្យា។ ដែលបានបង្កើតការងារដល់ប្រជាជនកម្ពុជាយើងប្រមាណ៣០០នាក់។
ដោយឡែកក្រុមហ៊ុន Hyundai Agro (Cambodia) Co., Ltd ដែលមានទីតាំងវិនិយោគស្ថិតនៅភូមិ៦ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ បានវិនិយោគលើផ្ទៃដីទំហំប្រមាណ៣០០ហិកតា ដើម្បីដាំដំណាំស្វាយ បច្ចុប្បន្នអាចប្រមូលផលផ្លែស្វាយបានប្រមាណ១.០០០តោនក្នុងមួយឆ្នាំ។
ក្រុមហ៊ុនគ្រោងនឹងដាំ និងប្រមូលទិញបន្ថែមសម្រាប់ការនាំចេញទៅប្រទេសកូរ៉េចំនួន ១០.០០០តោន ក្នុងមួយឆ្នាំ និងទីផ្សាជប៉ុនបន្ថែមទៀត។
គណៈប្រតិភូក្រសួងពាណិជ្ជកម្ម រួមមានក្រុមហ៊ុនហ្រ្គីនត្រេដ សហការជាមួយ សហព័ន្ធស្រូវអង្ករកម្ពុជា បានអញ្ជើញទៅប្រទេសបង់ក្លាដេស កាលពីថ្ងៃទី១១ ខែសីហា ឆ្នាំ២០១៧ ដើម្បីធ្វើការពិភាក្សាលម្អិតបន្ថែម អំពីពាណិជ្ជកម្មអង្ករជាមួយគណៈប្រតិភូអន្តរក្រសួងនៃសាធារណរដ្ឋប្រជាមានិតបង់ក្លាដេស។
ក្រោយបញ្ចប់ការពិភាក្សា ប្រទេសបង់ក្លាដេស បានយល់ព្រមទទួលទិញអង្ករ ក្នុងបរិមាណ ២៥០,០០០តោន ពីកម្ពុជា តាមផ្លូវរដ្ឋ ចាប់ពីថ្ងៃចុះហត្ថលេខា ដើម្បីពង្រីកការនាំចេញអង្ករទៅបង់ក្លាដេស។
នេះជាផ្នែកមួយនៃការអនុវត្តន៍នូវគោលនយោបាយនាំចេញអង្កររបស់រាជរដ្ឋាភិបាលកម្ពុជាអោយបាន ១លានតោន។
កាលពីថ្ងៃទី០២ ខែសីហា ឆ្នាំ២០១៧ កន្លងទៅនេះ រាជរដ្ឋាភិបាលកម្ពុជា តាមរយៈក្រសួងពាណិជ្ជកម្ម ដែលជាសេនាធិការ បានចុះអនុស្សរណៈយោគយល់ ជាមួយរដ្ឋាភិបាលបង់ក្លាដេស លើការលក់អង្ករចំនួន ១លានតោន នៅក្នុងរយៈពេល ៥ឆ្នាំ (២០១៧-២០២២) ក្នុងគោលបំណងធ្វើពិពិធកម្មទំហំពាណិជ្ជកម្ម និងជំរុញកំណើនសេដ្ឋកិច្ច ពិសេសធានាបាននូវស្ថិរភាពវិស័យស្រូវ-អង្ករ ក៏ដូចជាប្រសិទ្ធភាពនៃការអនុវត្តគោលនយោបាយនាំចេញអង្ករឲ្យបាន ១លានតោនក្នុងមួយឆ្នាំ របស់រាជរដ្ឋាភិបាល។
